भक्तपुर,  ९ असोज : बीर अस्पताल पछिको दोश्रो अर्थात १२१ वर्ष पुरानो भक्तपुर अस्पतालमा पहिलोपटक न्युरोसर्जरी सेवा सुरु भएको छ । अस्पतालले मस्तिष्कमा रक्तस्राव भएका ८० वर्षीय बिरामीको भक्तपुर अस्पतालमा पहिलो पटक शल्यक्रिया सफलतापूर्वक सम्पन्न गरेको अस्पताल विकास समितिका अध्यक्ष ज्ञानराम श्रेष्ठले जानकारी दिनुभयो ।

अस्पतालमा ब्रेन ह्यामरेज भएर बिहिबार भर्ना भएका ८० वर्षीय बिरामीको अस्पतालले पहिलो पटक सफलतापूर्वक न्युरोसर्जरी सम्पन्न गरिएको आज सञ्चारकर्मीलाई उहाँले जानकारी दिनुभयो ।

अस्पतालका निर्देशक डा. त्रिभुवनचन्द्र झाले अस्पतालमा पहिलो पटक न्युरोसर्जन डा. माणिककुमार लामाको नेतृत्वको चिकित्सक टोलीले बिरामीको मस्तिष्कको दायाँपट्टि जमेको रगत निकाल्नुका साथै देब्रेतर्फ कमजोर बनेको भागको सफलतापूर्वक शल्यक्रिया गरेकोे जानकारी दिनुभयो ।

निर्देशक डा. झाले भन्नुभयो, “मस्तिष्कसम्बन्धी जटिल समस्या लिएर भक्तपुर अस्पताल आउँने विरामीको उपचार सेवा सुरु भएको छ । पहिलो पटक अस्पतालले न्यूरोको सर्जरी स्म्पन्न गरेको छ । यो ठूलो सफलता हो । विरामीले न्यूरो उपचारका लागि अब काठमाडौंका अस्पताल धाउनु पर्दैन । आगामी दिनमा थप विशिष्टीकृत सेवा विस्तार गर्दै जानेछौँ ।”

अस्पताल विकास समितिका अध्यक्ष श्रेष्ठले अस्पतालले आगामी दिनमा थप विशेषज्ञ सेवा विस्तार गर्ने बताउदै हाल ३०० शय्यामा सञ्चालित भक्तपुर अस्पतालले १५ शय्याको आईसीयू, १० शय्याको पीआईसीयू, १० शय्याको एनआईसीयू र एचडीयू तथा पाँच शय्याको एसएनसीयू छन् सञ्चालनमा रहेको बताउनुभयो । अध्यक्ष श्रेष्ठले अस्पतालमा हाल दैनिक एक हजारभन्दा बढी बिरामीलाई सेवा दिइरहेको जानकारी दिनुभयो ।

वागमती प्रदेश स्वास्थ्य मन्त्रालयकी सचिव डा. समित्रा गौतमले रिफर सेन्टरको रुपमा रहेको भक्तपुर अस्पताललाई सुबिधा सम्पन्न गुणस्तरीयस्वास्थ्य सेवा सञ्चालन गरिरहेको बताउदै वागमती प्रदेश सरकारले भक्तपुर अस्पताललाई नमूना अस्पतालको रुपमा विकास गर्ने बताउनुभयो ।

मन्त्रालयले भक्तपुर अस्पतालमा अत्याधुनिक प्रबिधि एवं उपकरण थप गर्ने, आवश्यक जनशक्ति थप गर्ने, आधुनिक पूर्वाधारयुक्त भवन निर्माण गर्ने र बिशेषत्र अस्पतालको रुपमा विकास गर्ने गरि अगाडि बढेको सचिव डा. गौतमले जानकारी दिनुभयो ।