काठमाडौं : प्रदेश नम्बर १का मुख्यमन्त्री राजेन्द्रकुमार राईले १ नं. प्रदेशमा किरातीहरूको हकदाबी लाग्ने बताएका छन् । प्रदेशमा किरातीहरूले पहिलोपटक बस्ती बसालेर मानव सभ्यताको विकास गरेको भन्दै उनले त्यसमा उनीहरूको हकदाबी लाग्ने बताएका हुन् ।
शनिबार काठमाडौंको टुँडिखेलमा आयोजित साकेला शुभकामना आदानप्रदान कार्यक्रमलाई सम्बोधन गर्दै मुख्यमन्त्री राईले प्रदेशको नामाङ्कन गर्दा किरातीहरूले हकदाबी प्रस्तुत गर्न पाउने बताएका हुन् । उनले प्रदेशको नामाङ्कन गर्दा आफू किरातसहित बहुपहिचानको पक्षमा रहेको समेत बताए ।
‘एक नम्बर प्रदेशमा किरातीहरूको हकदाबी लाग्छ’, उनले भने, ‘त्यहाँ सबभन्दा पहिला किरातीहरू बसेर एउटा समृद्ध सभ्यता निर्माण गरेका छन् । उनीहरूको सभ्यता त्यहीँ विकसित भएको प्रमाणित छ ।’ प्रदेशका वनजङ्गल, खोलानालालगायतका ठाउँको नाम किराती भाषाबाट रहेको स्मरण गर्दै ती नामले त्यहाँ किरातीले नै सबभन्दा पहिले मानव वस्ती बसालेको प्रमाणित हुने दाबी गरे ।
जहाँ जसको बाहुल्यता हुन्छ, त्यहाँ सोअनुसार स्थानको नामाङ्कन गर्ने प्रचलन रहेको बताउँदै उनले बाहुल्यताका आधारमा पनि १ नम्बर प्रदेशलाई किरात नामाङ्कन गर्नुपर्ने बताए । ‘कुनै ठाउँमा वस्नेत गाउँ, कार्की गाउँ भनेर नाम राख्ने चलन छ । त्यो ठाउँमा उनीहरूको बाहुल्यता वा सबभन्दा पहिले उनीहरू आएर बसेकाले त्यसरी नाम राखिन्छ’, उनले भने, ‘प्रदेश १ का क्षेत्रमा मानव वस्ती बस्न थालेदेखि सबभन्दा पहिले किरातीहरू बसे । अहिले विभिन्न जातिहरूको बसोबास रहेपनि किरातीहरूको बाहुल्यता छ ।’
प्रदेश १ को नामाङ्कन गर्ने विषय पेचिलो बनेको छ । पहिचानसहितको नामाङ्कनमा राजनीतिक दलहरूको मत नमिलेपछि प्रदेशको नाम संसदमा प्रस्ताव समेत हुन सकेको छैन ।
