काठमाडौं, २ माघ । नेपाल आयल निगमले निगमको सुदूरपश्चिमस्थित धनगढी प्रादेशिक डिपो कैलालीको गोदावरीमा स्थानान्तरण गर्ने भएको छ ।
निगमका अनुसार डिपोको लागि कैलालीको गोदावरी नगरपालिका ८ स्थित पूर्व-पश्चिम राजमार्ग नजिकैको २० बिघा १६ कठ्ठा ८ धुर क्षेत्रफल जग्गा प्राप्तिको प्रकृया थालेको छ । उक्त जग्गा प्राप्तिका लागि निगमले जग्गा प्राप्ति ऐन २०३४ अनुसार प्रक्रियाअघि बढाइएको निगमको भण्डारण क्षमता अभिवृद्धि परियोजनाका प्रमुख प्रदीप यादवले जानकारी दिए । कैलालीको अत्तरियामा पेट्रोल १८०० किलोलिटर, डिजेल ६६०० किलोलिटर, मट्टितेल ५०० किलोलिटर र पानी ट्यांकी ३००० किलोलिटर क्षमतासहित कुल ११९०० किलोलिटर क्षमताको स्मार्ट डिपो निर्माण हुने भएको हो।आगामी २०८२ वैशाखमा सिलान्यास गरी २०८४ मा यसको निर्माण सम्पन्न गर्ने लक्ष्य रहेको यादवले जानकारी दिए । यसको कुल लागत ३ अर्ब ५० करोड रुपैयाँ छ।
परियोजनाले बुधबार पत्रकार सम्मेलन गर्दै यस्तो जानकारी दिएको हो। निगमले यसअघि कञ्चनपुर जिल्लाको पुनर्वास ३ र ६ स्थित राष्ट्रीय आवास कम्पनीको ७४ बिघा जग्गामध्ये २२ बिघा जग्गा मांग गरेको थियो । तर उक्त जग्गा उपलब्ध हुने अवस्था नभएपछि कैलालीको अत्तरियामा जग्गा खोजिएको हो ।
हाल धनगढीको भीमदत्त पन्त राजमार्गसँगै जोडिएको चटकपुरमा १ विगहा ८ कटहा जग्गामा बिद्यमान डिपो सञ्चालनमा छ । यो डिपोको क्षमता २ हजार ८९० किलोलिटर क्षमताको डिपो ४५ वर्ष पहिले दैनिक ४ ट्यांकरबाट इन्धन लोड अनलोड गर्ने सुविधाको मात्र छ।
उक्त डिपो घना बस्तीसँगै भएको र अहिलेको व्यावसायिक माग समेत धान्न नसक्ने भएकाले कैलालीको अत्तरियामा सार्न लागिएको यादवले जानकारी दिए । डिपोका कारण बस्तिसमेत जोखिममा परेकाले डिपो सार्न लागिएको हो। यो डिपो २०३७ सालमा निर्माण भएको थियो । त्यो वेला उक्त क्षेत्रमा सर्वसाधारणको बस्ती थिएन । अहिले डिपो वरिपरी विस्तारै बाक्लो घना मानव वस्ती बसिसकेको छ ।
स्थानीयबासिन्दाले डिपो घनावस्तीको बीचमा भएको भन्दै धनगढी नगरपालिकामा दैनिक रुपमा गुनासो आउन थालेपछि नगरपालिकाले समेत उक्त डिपो सार्न निगमलाई आग्रह गर्दै आएको थियो । यस्तै उद्योग, वाणिज्य तथा आपूर्ति मन्त्री दामोदर भण्डारीलाई समेत स्थानीयबासीले उक्त डिपो सार्नुपर्ने भन्दै ध्यानाकर्षण गराएका छन् । मन्त्री भण्डारीले समेत डिपो सार्न निगमलाई निर्देशन दिएका छन् ।
‘पहिलेको तुलनामा इन्धनको बिक्री बढ्दै गर्दा हालको डिपोमा ट्याँकरलाई इन्धन लोड अनलोड गर्न पनि ठूलो समस्या भएको छ,’ यादवले भने,‘साँघुरो भएर ट्याँकर राख्नसमेत ठूलो समस्या भएको छ । साथै डिपोका कारण स्थानीय वस्ती पनि जोखिममा परेकाले सार्ने योजनामा निगम अघि बढेको छ ।’ उक्त डिपोबाट सूदुरपश्चिमको ९ जिल्ला दार्चुला, बैतडी, डडेलधुरा, कञ्चनपुर, बझाङ्ग, बाजुरा, डोटी, अछाम र कैलालीमा इन्धन वितरण भइरहेको छ ।
डिपोबाट दैनिक ८० किलोलिटर पेट्रोल, २५० किलोलिटर डिजेल बिक्री हुन्छ । डिपोमा हाल ७ दिनको माग पुग्ने गरी ७६० किलोलिटरको २ वटा डिजेलको भर्टिकल ट्याँकी छ भने ७६० किलोलिटरकै १ वटा पेट्रोलको डिपो छ । यसबाहेक ७०–७० किलोलिटरको पेट्रोल, डिजेल र मट्टिटेलको तीनवटा अन्डरग्राउण्ड ट्याँकी छ ।
स्मार्ट डिपो निर्माणको डीपीआरको जिम्मा काठमाडौं विश्वविद्यालयलाई दिइने जनाएको छ ।
