हेटौडा, १ असोज । संविधान दिवसको अवसरमा बागमती प्रदेशका ्मुख्यमन्त्री किरण थापा मगरको टिम र प्रमुखसचिवसहितको टिमबीच आज मैत्रीपूर्ण फुटबल खेल सम्पन्न भएको छ ।
संविधान दिवसलाई उत्साह, उमंग, आपसी सद्भाव र सहकार्यका साथ मनाउने उद्देश्यले आयोजना गरेको यस मैत्रीपूर्ण खेलले प्रदेश सरकारको राजनीतिक नेतृत्व र प्रशासनिक नेतृत्वबीचको आत्मीयता, सहकार्य, समन्वय र टीम भावना अझ सुदृढ बनाएको मुख्यमन्त्री थापाले बताउनु भयो ।
मुख्यमन्त्री किरण थापाले भन्नुभयो, ‘खेलकुद केवल शारीरिक तन्दुरुस्ती मात्र होइन, यसले अनुशासन, सहकार्य, नेतृत्व क्षमता, आपसी विश्वास र एकताको भावना समेत अभिवृद्धि गर्दछ । सरकारको प्रभावकारी कार्यसम्पादनका लागि नेतृत्व र कर्मचारीबीचको सहकार्य र समन्वय अपरिहार्य हुन्छ ।’
संविधानले दिएको जिम्मेवारीलाई आत्मसात् गर्दै सुशासन, विकास, सेवा प्रवाह र समृद्ध बागमती निर्माणका लागि हातेमालो गर्दै अघि बढ्ने प्रतिबद्धतासहित संविधान दिवसलाई थप उत्साहपूर्ण र स्मरणीय बनाइएको उहाँले बताउनुभयो ।
